ނ. އަތޮޅު މަދަރުސާގެ އިސްދަރިވަރުންގެ ބައްދަލުވުމެއް މާލޭ އިންގްލިޝް ސްކޫލްގައި ބޭއްވިއްޖެ

ފޮޓޯތައް ބޮޑުކޮށް ބެއްލެވުމަށް ފޮޓޯއަށް ކްލިކް ކޮށްލައްވާ

ނ. އަތޮޅު މަދަރުސާއަށް 30 އަހަރު ފުރޭ ޚާއްޞަ މުނާޞަބަތާއި ގުޅުވައިގެން ޓާސްކްފޯހެއް އެކުލަވާލުމުގެ ގޮތުން އިސްދަރިވަރުންގެ ތެރެއިން ބޭފުޅުންކޮޅެއް އިސްނަންގަވައިގެން ރޭ އެމް.އީ.އެސްގައި ބޭއްވި ޚާއްޞަ ބައްދަލުވުމަކީ ތާރީޚީ ބައްދަލުމެކެވެ. މިބައްދަލުމަށް ގާތްގަނޑަކަށް މަނަދޫގެ ފަންސާހަކަށް ބޭފުޅުން ހާޒިރުވެލެއްވިއެވެ. ބައްދަލުވުމުގައި މައިގަނޑު ގޮތެއްގައި ވާހަކަ ދެކެވުނީ އަތޮޅު މަދަރުސާއަށް 30 އަހަރު ފުރޭތީ ރާވާހިންގާނެ ޕްރޮގްރާމްތަކާއި ބެހޭގޮތުންނެވެ. މިބައްދަލުވުމުގައި އެކިކަންކަމަށް ބޭފުޅުން އައްޔަންކޮށް އެބޭފުޅުނަށް ޓާސްކް ޙަވާލުކުރުންއޮތެވެ. މީގެ އިތުރުން ބައްދަލުވުމުގެ ބައިވެރިންގެ މެދުގައި ވަރަށް ފުޅާދާއިރާއެއްގައި ޚިޔާލުބަދަލު ކޮށް، އަތޮޅު މަދަރުސާގެ މުސްތަޤްބަލާއި ބެހޭގޮތުންނާއި ރަނގަޅުކުރަން ޖެހޭކަންތައްތަކާއި ބެހޭގޮތުން ވާހަކަ ދެކެވުނެވެ. މިބައްދަލުވުމުގައި ބައިވެރިންގެ ފަރާތުން ރަނގަޅު ހުށަހެޅުންތަކެއް ލިބިފައިވާކަމަށް މަޢުލޫމާތު ލިބިފައިވެއެވެ. އެގޮތުން އިސްދަރިން ވަރުންގެ ޖަމިއްޔާއެއްގެ މުހިންމުކަމާއި، އަތޮޅު މަދަރުސާއަށް 30 އަހަރުފުރޭތީ 30 އަހަރުގެ ހަނދާނީ ބިނާއެއް ހެދުމުގެ މައްޗަށާއި، އަތޮޅު މަދަރުސާއަށް އެކިއެކި ރޮނގުރޮނގުން ޚިދުމަތް ކޮށްދެއްވާފައިވާ ފަރާތްތަކަށް އެކަމުގެ އަގުވަޒަންކޮށް ހަނދާނީ ފިލައެއް އެރުވުމުގެ މައްޗަށް ވާހަކަ ދެކެވުނެވެ. އަތޮޅު މަދަރުސާގެ މިވަރުގެ ބޮޑު ޢީދެއް އަންނައިރު، އެ މަދަރުސާއަށް ގިނަދުވަހު ޚިދުމަތް ކުރައްވާފައިވާ ބައެއް ބޭފުޅުންނަށް މިއިން އެއްވެސް ކަމެއްގެ މަޢުލުމާތު މަދަރުސާއިން ދެއްވާފައިނުވާކަމަށް ބައިވެރިފަރާތަކުން ޝުޢޫރު ފާޅުކުރެއްވިއެވެ. މިބައްދަލުވުމުގައި ޓާސްކްފޯސް ކޮމެޓީގެ ނާއިބް ރައީސް އަދި މަނަދޫ ކަތީބު އަލްފާޟިލް ސަޢީދު ޤާސިމް ބައިވެރިވެވަޑައިގެންނެވިއެވެ. މަދުވެގެން މަހަކު މިފަދަ އެއް ޖަލްސާ ބާއްވައިދިނުމަށް އެދި އިސްދަރިވަރުންގެ ތެރެއިން ބައެއް ކުދިން ވަނީ ރޭގެ ބައްދަލުވުމަށް ހުށަހަޅާފައެވެ